Universitet talabalarini korxona va tashkilotlarda amaliyot jarayonlarini tashkil etish, “Tarmoq – korxona – oliygoh” zanjirini yaratish, dual ta’lim tizimini samarali amalga oshirish hamda yirik korxonalarda ilmiy tadqiqot ishlari va tajriba almashish maqsadida, Navoiy davlat universiteti rektori, professor Muhiddin Kalonov “Zarafshon Golden Group” — ZGG kompaniyasi ta’sischisi, tadbirkor Ulug’bek Fayziyev bilan uchrashib, muzokara olib bordi.

Unda viloyatdagi ishlab chiqarish korxonalari, tadbirkorlik subyektlari, qishloq xo‘jaligi va xizmat koʻrsatish sohalariga malakali kadrlarni tayyorlashda oʻzaro hamkorlikning ahamiyati haqida fikrlar almashildi. Jumladan, “tarmoq – korxona – oliygoh” zanjiri asosida amaliy ishlarni boshlash, talabalarni zaxira kadrlar sifatida tayyorlab, kelgusida korxonaga ishga joylashtirish, ishlab chiqarish, qishloq xo‘jaligi hamda xizmat ko‘rsatish sohalarida mavjud muammolarni universitet bilan birgalikda ilmiy yondashuv asosida yechimlar topish, dual ta’lim tizimi bo‘yicha birgalikda ishlash yuzasidan muloqot qilindi.

Shuningdek, uchrashuv davomida ZGG kompaniyasi bilan yaqin hamkorlik qilish uchun memorandum imzolashga kelishib olindi.