Davlat xizmatini rivojlantirish agentligi Navoiy viloyati filiali hamda Navoiy davlat pedagogika instituti hamkorligida tashkil etilgan qisqa muddatli malaka oshirish kurslarining navbatdagi bosqichi boshlandi.

Unda tuman va shahar hokimliklarining moliya-iqtisodiyot va kambagʻallikni qisqartirish masalalari boʻyicha mutaxassislari hamda raqamli iqtisodiyotni joriy etish boʻyicha loyihalar menejerlari ishtirok etmoqda.

Mashgʻulotlar "Oʻzbekiston Respublikasining “Davlat fuqarolik xizmati toʻgʻrisida”gi Qonuni mazmun-mohiyati va davlat fuqarolik xizmatchisining odob-axloq qoidalari", "Hududlarni ijtimoiy - iqtisodiy rivojlantirish dasturini ishlab chiqish", "Raqamli iqtisodiyot sharoitida hudud va tarmoqlarni raqamli transformasiya qilish" kabi dolzarb mavzularda boʻlib oʻtmoqda.

Eslatib oʻtamiz, hokimlik mutaxassislari uchun malaka oshirish kurslari joriy yilning 29-may kuniga qadar davom etadi.